CIVIL WEDDING

Opisyal nang nagsimula ng panibagong yugto ng kanilang buhay ang anim na magkasintahan matapos silang pag-isahin sa kasal ni Municipal Mayor Rodencio “Ruding” S. Gonzales sa kanyang tanggapan ngayong araw ng Miyerkules.

Sa kanyang mensahe, binigyang-diin ni Mayor Ruding na ang matatag na pagsasama ay hindi lamang nakabatay sa pagmamahal kundi higit sa lahat sa respeto at kababaang-loob sa isa’t isa, lalo na sa pagharap sa mga hamon ng buhay mag-asawa.

Aniya, maaaring magbago ang maraming bagay sa paglipas ng panahon, ngunit ang respeto at mabuting pagpapahalaga sa pamilya ang isa sa pinakamahalagang maipapamana ng mag-asawa sa kanilang mga magiging anak.

Nagtapos ang seremonya sa isang makabuluhang paalala mula sa alkalde: sa mundong puno ng pagbabago, ang mga salita ng Diyos ang nananatiling gabay at sandigan ng bawat pamilya.